Bildiyiniz kimi Azərbaycan Respublikası Prezidentinin müvafiq Sərəncamı ilə “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı”  təsdiq edilmişdir.
Dövlət Proqramının müvafiq prioritet istiqamətlərinə daxil olan Muxtar Respublikada əlverişli biznes mühitinin yaradılması və sosial sektorun inkişafı istiqamətləri üzrə özəl sektor tərəfindən sosial xidmətlərin əhatə dairəsinin genişləndirilməsi və özəl təhsil müəssisələrinin yaradılması üçün sahibkarlar arasında təşviqat işlərinin aparılması nəzərdə tutulmuşdur. 

Naxçıvanda biznes subyektlərinin maliyyə resurslarına çıxışının asanlaşdırılması məqsədilə Azərbaycan Respublikası Sahibkarlığın İnkişafı Fondu tərəfindən Naxçıvanda fəaliyyət göstərən bütün banklara 15 milyon manat vəsait ayrılıb. Bu vəsaitdən cari ilin 10 ayı ərzində sahibkarlara 1 milyon 390 min manat güzəştli şərtlərlə kredit verilib.

Şərur  Sənaye Məhəlləsi Naxçıvanda ən böyük sənaye infrastruktur layihələrindəndir. Məhəllədə artıq 7 sahibkarlıq subyekti fəaliyyət göstərir. Yaxın vaxtlarda isə daha bir neçə sahibkarın fəaliyyətə başlaması nəzərdə tutulur.

Naxçıvan Muxtar Respublikasının İqtisadiyyat Nazirliyi muxtar respublikanın rayonlarında fəaliyyət göstərən sahibkarlar və ailə təsərrüfatçıları ilə müzakirələri davam etdirir. Növbəti belə tədbir noyabrın 16-da Kəngərli rayonunda keçiriləcək. 

Görüşdə İqtisadiyyat Nazirliyinin, Sahibkarlığın İnkişafı Fondunun, Kəngərli rayonu İcra Hakimiyyətinin, “NaxçıvanBank” ASC-nin nümayəndələri iştirak edəcəklər.

Yerli məhsulların xarici bazarlarda tanıdılması, "Made in Azerbaijan" brendinin təşviqi məqsədilə Naxçıvan sahibkarları müxtəlif formatlı tədbirlərdə, o cümlədən mütəmadi olaraq beynəlxalq sərgilərdə iştirak edirlər. Növbəti dəfə yerli məhsullarımız 7-9 noyabr 2023-cü il tarixlərdə Dubay şəhərində keçirilən “İSM Middle East-2023” Beynəlxalq Şirniyyat Sərgisində nümayiş edilib.

          Naxçıvan Muxtar Respublikasının İqtisadiyyat Nazirliyi və Naxçıvan Sahibkarlar Konfederasiyasının təşkilatçılığı ilə noyabrın 7-də Naxçıvan Biznes Mərkəzində 8 noyabr – şanlı Zəfər gününə həsr olunmuş tədbir keçirilib.

          Bununla əlaqədar olaraq Naxçıvan Muxtar Respublikasının İqtisadiyyat Nazirliyinin kollektivi Zəfər Parkını ziyarət edib, vətənimizin ərazi bütövlüyü uğrunda mübarizədə canlarını fəda etmiş şəhidlərimizin əziz xatirəsi dərin ehtiramla yad olunub.

NUHÇIXAN xəbər verir ki, noyabrın 4-də Naxçıvan Biznes Mərkəzində Naxçıvan Muxtar Respublikası Nazirlər Kabinetinin təşkilatçılığı ilə Azərbaycan Respublikasının Prezidenti cənab İlham Əliyevin hakimiyyətə gəlişinin 20 illiyi və Zəfər Gününün 3-cü ildönümünə həsr olunmuş “Zəfərə gedən 20 il” mövzusunda tədbir keçirilib.

 Əvvəlcə Azərbaycan Respublikasının Dövlət Himni səsləndirilib, Ümummilli Lider Heydər Əliyevin, şəhidlərimizin əziz xatirəsi bir dəqiqəlik sükutla yad edilib.

Son 20 ildə Naxçıvan Muxtar Respublikasında dövlət mülkiyyətinin özəlləşdirilməsi nəticəsində 21 milyon 668 min manatdan artıq vəsait dövlət büdcəsinə, müəssisə və təşkilatların hesabına köçürülüb. NUHÇIXAN xəbər verir ki, bunu yerli iqtisadiyyat naziri Tapdıq Əliyev Naxçıvanda “Zəfərə gedən yolda 20 il” mövzusunda keçirilən tədbirdə bildirib.

2003-2023-cü illər ərzində İqtisadiyyat Nazirliyi yanında Sahibkarlığın İnkişafı Fondu tərəfindən Naxçıvan Muxtar Respublikasında fəaliyyət göstərən sahibkarlıq subyektlərinin 1 828 investisiya layihəsinin maliyyələşdirilməsinə 187 milyon 110 min manatdan çox güzəştli kredit verilib.

NUHÇIXAN xəbər verir ki, bunu muxtar respublikanın iqtisadiyyat naziri Tapdıq Əliyev Naxçıvanda “Zəfərə gedən yolda 20 il” mövzusunda keçirilən tədbirdə deyib.